কড়অর তলে ঢোলর বারি
উৎপলকান্তি বড়ুয়া
কঅন্ খেয়ালত্ কঅরে কতা কঅন্ খেয়ালত্ চলঅ,
বুঝিত্ পারে পেন্ডা পোয়া উলঅমস্ত পল্—অ!
মুখর হাসি মিয়াই দিলা মিডা কতার রসত্
বেয়াগে জানে ক্যান গরি তুঁই আনি ফেল—অ বশত্!
কঅন্ পথত্ তুঁই হাঁডঅরে ভাই কঅন্ কাম্ তুঁই গরঅ,
ভালাই জানঅ কউন্যা চিঅইন কউন্যা মোডা—দরঅ!
ন লাগিলি ফেলাই দিলা থিয়াত্ উদা মারি,
ফিরি—অ ন চ—অ হাঁডি য—অগই বঁউরা লারি লারি।
এইল্যা তোঁয়ার গম খাছিয়ত্ বেয়াগর আছে জানা,
যারে ধর—অ হিতারে তুঁই গরি ফেল—অ ফানা।
মইরল্যে হিতার ডাগত্ ন যঅ লইরল্যে চইরল্যে খ—অ,
জেব ডাঁডইয়া পাইলে হিতার কিস্তা—কাইনি গ—অ।
তুইলতে তুইলতে মাথার উদ্দি আসমানর উত্ তোল—অ,
শেষমেশে যাই বেচারারে খুইচ্ছা ছোলা ছোল—অ!
বুগত্ রাখঅ, যেইবা তোঁয়ার কামত্ লাগিবু,
কড়অর তলে ঢোলর বারি ক’দিন থাগিবু?
